KUGIXABEZWE IZIKOLE (48) NGEZINSIZA ZEMIDLALO EMGUNGUNDLOVU
UNGQONGQOSHE uMnuz Mntomuhle Khawula nezipho abezozinika izikole ezingama-48.
ABAFUNDI kanye nothisha bejabulela izipho ezifike noKhawula.IZITHOMBE: KZNDSAC
MALIBONGWE MAZIBUKO
KUGIXABEZWE izikole ezingama-48 eMgungundlovu ngezinsiza zemidlalo, ngenhloso yokuthuthukisa ezimidlalo ezingeni lezikole, ngoLwesithathu, eMpophomeni Stadium eHowick. Lokhu kwenziwe uMnyango wezeMidlalo, ezobuCiko namaSiko KwaZulu-Natal oholwa uNgqongqoshe uMntomuhle Khawula, othe bakwenza ngenhloso yokuthuthukisa ezemidlalo ezikoleni nokunika intsha amathuba okuthuthukisa amakhono ayo.
Lolu hlelo luhlose ukuqinisa ukuthuthukiswa kwabasubathi abasebancane nokukhuthaza ukubamba iqhaza kwentsha emidlalweni kusukela zisafunda ezikoleni.UNgqongqoshe uKhawula ugcizelele ukuzibophezela komnyango ekuqhubekeni nokutshala izinsiza, ezizovulela intsha amathuba okufeza amaphupho ayo kwezemidlalo.“Sikholelwa ukuthi wonke umpetha uqala ngokunikwa ithuba. Yingakho siqhubeka nokutshala imali ekuthuthukiseni ezemidlalo ezikoleni nasemiphakathini yethu.
Le mishini esiyinikezayo namuhla izosiza intsha ukuthi ithuthukise amakhono ayo. Izokwazi ukuzethemba, ifunde ukuziphatha kahle, ilwele impumelelo. Sifuna ukubona iKwaZulu-Natal iqhubeka ikhiqiza abasubathi abazomela isifundazwe nezwe emiqhudelwaneni emikhulu,” kusho uKhawula.Lolu hlelo kulindeleke ukuthi luphinde lukhulise ukubamba iqhaza emidlalweni ehlukene, lukhulise amathuba okutholakala kwethalente elizomela isifundazwe, nezwe emiqhudelwaneni emikhulu esikhathini esizayo.