UGWETSHWE ODILIKAJELE ABABILI OWABULALA UMYENI WAKHE

UMBIKO: AKHONA DLAMINI
KUDUME ihlombe namakhwelo ngenkathi uNtombizodwa Ntinga (46), egwetshwa odilikajele ababili ngamacala okubulala ngesihluku umyeni wakhe, uWarrant Officer Nkosinathi Ntinga (49) noMpendulo Mdluli (34). Lesi sigwebo senzeke eNkantolo eNkulu yaseMtubatuba KwaZulu-Natal.
UNtinga nowayehambisana naye, uSamkelo Mpanza (22), balahlwe yicala namuhla, ngemuva kophenyo olunzulu lwama-Hawks. Lezi zigameko zokubulala zenzeka ngo-Agasti 1, 2023, ngesikhathi uNtinga noMdluli behlaselwa emzini kaNtinga. Baphucwa izibhamu namaselula ngaphambi kokuthi bathunjwe.
Kuvele ukuthi uMdluli washaywa waphushwa emotweni ehambayo, kwathi uNtinga watholwa eshonile enamanxeba okudutshulwa eduze komfula uMsunduzi. Amaphoyisa ophiko lwamaHawks asheshe abopha abasolwa engakapheli amahora angu-24, bathola isibhamu somsebenzi esisodwa ebesintshontshiwe. Ngaphandle kwezigwebo zodilikajele, uNtinga uthole izigwebo ezengeziwe ngamacala okugebenga nokuthumba. UMpanza ugwetshwe iminyaka engu-72, ngawo womabili amacala okubulala, ukubamba inkunzi nokuthumba, aqhubeke kanyekanye.
UMajor General (Dr) Lesetja Senona uncome ithimba labaphenyi nabashushisi ngomsebenzi wabo, wokuzikhandla nokuletha ubufakazi obubambekayo..