USHIVAMBU UTHI ABEKHO KUMKHANKASO WOKUNXENXA ABAHOLI BAJOYINE MKP
SINETHEMBA NGCOBO
UNOBHALA jikelele woMkhonto weSizwe Party uMnuz uFloyd Shivambu uthi beyiqembu iMK Party abekho emkhankasweni wokunxenxa abaholi bamanye amaqembu ukuba bajoyine leli qembu.
UShivambu ukhulume kanje izolo nenhlangano yabezindaba iSABC, kulandela izinsolo zokuthi uDkt uMbuyiseni Ndlozi oyilungu le-EFF ePhalamende eKapa usendleleni ebheke kwiMK Party eholwa owayenguMengameli kuleli uMnuz uJacob Zuma.
Lezi zinsolo ziqubuke ngemuva kokuthi iMk Party yamukele u-Adv Dali Mpofu owayengusihlalo we-EFF ngesonto eledlula, uBusisiwe Mkhwebane obeyilungu le-EFF ePhalamende noWillies Mchunu owanguSekela Sihlalo we-ANC KwaZulu-Natal waphinde wabanguNdunankulu waseKZN, bobabili bajoyine iMK Party ngenyanga eyedlule.
“Angazi lutho ngomholi we-EFF noma walinye iqembu ozojoyina iMK Party.
“Uma kukhona abafuna ukusijoyina, sikhuthaza ukuthi baze ngokuthanda kwabo, nokubona ukuthi uMkhonto weSizwe Party uyaphambili.
“Kumele kucace ukuthi asikho emkhankasweni wokunxenxa abaholi bamanye amaqembu, asibabizi bayazizela,”kubeka uShivambu.
Lo Nobhala weMK Party kuzokhumbuleka ukuthi naye(uShivambu) walaxaza i-EFF, kuyo ashiye isikhundla sokuba uSekela Mengameli ayesibambe kusukela kwasungulwa i-EFF ngo 2013.
newsroom@umusamedia.co.za