ISILO SICACISE NGOSUKU LOKUKHOTHAMA KWE-LEMBE

ISILO uMisuzulu kaZwelithini

ZETHU PHOSWA

INDLULAMITHI uMisuzulu icacise ngosuku okwakhothama ngalo Inkosi uShaka kaSenzangakhona, nathe kwakungumhlaka 23 kuMandulo.
ISilo sithe iLembe lakhothama mhla ziyi-23 kuMandulo ngonyaka ka-1828, kanti lolu suku kuwusukuthi naso iSilo esazalwa ngalo ngonyaka ka-1974.
“ILembe lakhothama mhlaziyi-23, wathathwa umzimba waso wayobekwa entabeni. Phambilini bekuthi uma kushoniwe umzimba ubekwe entabeni ukuze udliwe yizilwane zasendle. Ngakusasa kwathunywa abantu ukuthi bayobheka ukuthi usudliwe kangakanani umzimba. Okwathusa ababethunyiwe ukuthi umzimba kawuzange uthintwe yizilwane, kodwa zaziwukhothamele. Kwabe sekuthunywa abantu ukuthi bawugade umzimba ukuze ufihlwe kahle,” kubeka iSilo
INdlulamithi ebe isinxusa ukuthi kwakhiwe isigodlo seLembe, ukuze yonke imikhosi yalo igujwe esigodlweni ngqo.
UNdunankulu waKwaZulu- Natal uncome indima eyaklanywa yiLembe okuholele ukuthi babe yisizwe esiziqhenyayo.
“ILembe lenze umlando ongasoze wacisheka. Baqopha umlando ngokwakha isizwe esiziqhenyanyo ngaso, bakha nolimi lwebele. Baphinda benza ukuthi sibe yisizwe esinobunye esisodwa,” kubeka uNdunankulu.
Ube esezibophezela njengohulumeni ukuqinisekisa ukuthi bazoxhasa imikhosi kaZulu, bayibungaze.