IZIKHULU ZAKWA-IEC ZETHULE IZINHLELO ZOKHETHO KWISILO

ISILO uMisuzulu KaZwelithini ekhuluma nezikhulu eziphezulu zakwa-IEC.

ISILO kanye nezikhulu eziphezulu kwa-IEC esigodlweni eMashobeni. IZITHOMBE: IEC

NOMCEBO NGEMA

IZIKHULU eziphezulu zenhlangano eyengamele ukhetho kuleli, i-Independent Electoral Commission (IEC), zothe iSilo uMisuzulu KaZwelithini esigodlweni eMashobeni oPhongolo, ngenhloso yokwethula izinhlelo zokhetho lohulumeni basekhaya.

Ithimba lakwa-IEC linikeze iSilo umbiko ogcwele ngesimo sokulungela ukhetho, okubalwa izikhathi ezibalulekile, ukulunga kwezinhlelo nemikhankaso yokufundisa abavoti, ngenhloso yokuqinisekisa ukhetho olukhululekile, olunobulungiswa noluthembekile.

Kulomhlangano kuphinde kwabhungwa kabanzi ngezinselelo ezikhona, mayelana nokuphepha komphakathi ezikhungweni zikahulumeni KwaZulu-Natal.
Lezi zingxoxo zithathwa njengenkundla ebalulekile yokuthola izindlela zokwakha kabusha ukwethenjwa nokubambisana ekuqiniseni intando yeningi kuleli.

ISilo silumukele kahle lolu hlelo, sase sigcizelela ukubaluleka kokhetho olukhululekile, olunokuthula noluthembekile, njengesisekelo sentando yeningi nozinzo emphakatini. Siphinde sagqamisa indima ebalulekile edlalwa abaholi bendabuko, ukukhuthaza ubumbano emphakathini, ukuzibophezela nokubamba iqhaza kwabantu ezinhlelweni zentando yeningi ikakhulukazi ezingeni lomphakathi.

“Nginxusa zonke izakhamuzi ezifanelekile ukuthi zivote, ziphume ngobuningi bazo zibhalise, ziphinde zizibheke ukuthi ziyavela yini ohlwini ikakhulukazi abantu abasha ukuze babambe iqhaza okhethweni ngendlela enokuthula,” kusho iSilo.

Zombili lezi nhlangothi zivumelene ngokuthi zizoqhubeka nokusebenzisana, ukuze kuthuthukiswe imfundo yabavoti, kuqiniswe ukubamba iqhaza komphakathi kukhetho.