LIHLEHLELE UNHLANGULANA ICALA LIKA-PEGGY NKONYENI
OWAYENGUNGQONGQOSHE woMnyango wezeMpilo KwaZulu-Natal uPeggy Nkonyeni obevele enkantolo izolo. ISITHOMBE: FACEBOOK
NOMCEBO NGEMA
UVELE kafushane izolo enkantolo kaMantshi eMgungundlovu lowo owayenguNgqongqoshe woMnyango wezeMpilo KwaZulu-Natal uPeggy Nkonyeni oneminyaka engama-64 ubudala, ngecala lenkohlakalo nokukhwabanisa.
I-National Prosecuting Authority (NPA), ithi ukuvela kukaNkonyeni kuhambisana nokusolwa ukuthi wabamba iqhaza ekuthengweni kwemishini yokuhlanza amanzi, nemishini esiza iziguli ukuthi ziphefumule ezibhedlela KwaZulu-Natal.
Le mpahla kuthiwa yathengwa enkampanini Intaka Holdings, ephethwe usomabhizinisi wase-Uruguay uDkt Gaston Savoi.
UNkonyeni uvele enkantolo ehambisana noBusisiwe Nyembezi , uVictor Ntshangase , u-Alson Sipho Buthelezi , uSandile Kuboni weKuboni Shezi Incoporated , uLindelihle Mkhwanazi no-Rowmoor Investements 783 (Pty) Ltd.
Leli cala lihlehlele umhla ziyi-11 kuNhlangulana kulonyaka enkantolo ephakeme eThekwini.