BATHOLE ULWAZI NGEMINGCELE NEZIKHUNGO EZISEMTHETHWENI ZOKUVOTA EVRYHEID
USOMLOMO kaMasipala waBaQulusi uNonkululeko Ndlela ekhuluma namalunga omphakathi.
AMALUNGA omphakathi efundiswa ngemingcele nezikhungo ezisemthethweni abazovotela kuzona. IZITHOMBE: ABAQULUSI MUNICIPALITY
NOMCEBO NGEMA
NJENGOBA isisemome impelasonto yokubhalisela ukuvota kukhetho lohulumeni basekhaya, ezokuba mhla zingama-21 kuya mhla zingama-22 kulenyanga, uMasipala waBaQulusi uqalile nezinhlelo zokufundisa umphakathi ngokubaluleka kokubhalisela ukuvota.
Lezi zinhlelo ziqale eSikhaleni naseMafikane kuWard 5 eVryheid, ziholwa uSomlomo uNonkululeko Ndlela ngokujutshwa uMasipala waBaQulusi.
USomlomo uthi uMasipala uqale lezi zinhlelo, ngenhloso yokufundisa umphakathi waseBaQulusini ngokubaluleka kokubhalisela ukuvota ngokubambisana nekhomishana eyengamele ukhetho kuleli i-Independent Electoral Commission (IEC).
Uchazele amalunga omphakathi ngokubaluleka kokubhalisela ukuvota, njengoba isabelo mali sikaMasipala waBaQulusi siqhamuka kuHulumeni omkhulu siye sanele kuphela amakhanda alaba ababhalisela ukuvota.
“Uma ungakubhaliseli ukuvota unciphisa isabelo mali sokusiza umphakathi ngezidingo zawo.
Kubalulekile ukuthi niphume nonke niyobhalisela ukuvota ukuze isabelo mali sizothi xaxa, ukuze izidingo zifike kalula futhi ngokushesha. Uma wena ungayi ukuyobhalisa lokho kusho ukuthi uncintela laba abaya ukuyobhalisa futhi ubambezela izidingo zabo ukuthi zifike kalula kubona,” kusho uSomlomo uNdlela.
UNksz Nondumiso Masondo wakwa-IEC ube wazise izakhamuzi ngezikhungo okuyizona ezisemthethweni abazovotela kuzo ngenxa yemingcele abakhele kuyo.
Amalunga omphakathi ashayele ihlombe uMasipala waBaQulusi ngokuletha lolu hlelo, wathi uthole ukuchazeleka ikakhulukazi ngemincele nezikhungo ekufanele bavote kuzo.
Lo mhlangano uphethe ngokuthi uSomlomo uNonkululeko alalele izikhalo nezidingo zomphakathi, uthembise ukubuya nezimpendulo ngomhlangano olandelayo.