BEHLELWE IMANA OSONKONTILEKA ABASAFUFUSA

KUSUKELA kwesokunxele uNksz Matlhodi Ngwenya oyisikhulu emsebenzini yezinkampani, uNgqongqoshe uMnuz Martin Meyer, uMnuz Khulile Nzo, no-Dkt Mpho Ndou weNyuvesi yaseGoli. ISITHOMBE: LWAZI MABASO

LWAZI MABASO

BEHLELWE IMANA osonkontileka abasafufusa ngohlelo lokucija ngolwazi, kulandela ukuthulwa ngokusemthethweni uhlelo iCIBD, ngoLwesibili eMusgrave Coastlands Hotel, eThekwini.

Lolu hlelo lwethulwe i-CIDB ngokubambisene neNyuvesi yaseGoli. kwe-CIDB (UJ) ne-University Of Technology (DUT), bazolekelela osonkontileka bakulesi sifundazwe.USihlalo webhodi le-CIDB uMnuz Khulile Nzo, uthi lolu hlelo luhlose ukushintsha le mboni, ngokunika osonkontileka abasakhula (Grade 2 kuya ku-Grade6), amakhono okubala imisebenzi, ukuphatha imali nokuletha imisebenzi esezingeni eliphezulu. “Lolu hlelo luzoba izinyanga ezintathu futhi kuzofundwa kuhlanganiswe amakilasi anobuchwepheshe besimanje (online), nokuhlangana ubuso nobuso (workshops). Lolu hlelo luxhaswe ngokuphelele yi-CIDB kosonkontileka abazokhethwa njengoba bengeke bakhokhe ngisho indibilishi,” kuchaza uMnuz Nzo.

UNgqongqoshe woMnyango wezeMisebenzi yoMphakathi neNgqalasizinda uMnuz Martin Meyer, uthi osonkontileka abaqeqeshiwe bazosiza ekwakheni izakhiwo ezingeke ziphazanyiswe ukuguquguquka kwesimo sezulu njengoba iKwaZulu-Natal ijwayele ukuhlaselwa izikhukhula. “Asikwazi ukwakhela imanje ekubeni sizophinde sibe nezinkinga ezifanayo kodwa kufanele ukuthi uma sakha sicabangele ikusasa, izakhiwo zikwazi ukumelana nezimo zokuguquguquka kwesimo sezulu,” kusho uNgqongqoshe uMnuz Meyer.

Uqhube wathi lolu hlelo luzoqhubeka minyaka yonke futhi yonke, umuntu onesitifiketi sikamatikuletsheni uvumelekile ukuthi afake isicelo sokuqeqeshwa.