KUQHAMUKWE NEZINDLELA EZINTSHA ZOKULWA NOBUGEBENGU KOWE-CCPA
UNOBHALA we-CCPA uJomo Swana.
AMALUNGU we-CCPA abethamele lomhlangano.
IZITHOMBE: SIYABONGA NGUBANE
AKHONA DLAMINI
ACOTSHELELWE ngolwazi nangezindlela ezintsha zokulwa nobugebengu,
amalungu enhlangano engenzi nzuzo, elwa nobugebengu i-Kwazulu Natal Community Crime Prevention Association, emhlanganweni wayo owenzeka minyaka yonke, obuseGateway Hotel, eThekwini.
UNobhala we-CCPA uJomo Swana, uthe
inhloso yalo mhlangano, ukubheka umsebenzi abawenzile onyakeni, badingide izingqinamba, baqhamuke nezisombululo, futhi bezwe izikhalazo ezivela kumalungu ale nhlangano.
USwana uthe kulo mhlangano bacobelelane ngamasu amasha okulwa nobugebengu emiphakathini abavela kuyo, bakhetha namalungu amasha.
“Ziningi izinhlangano ezingaphansi kwe-CCPA, okubalwa Isikebhe, Imikhumbi, Inkanyamba, Ojuluka -tsotsi namanye amaningi. Kulo mhlangano sizobheka ukuthi inhlangano ngayinye ilwa kanjani nobugebengu, ukuze sicobelelane ngamasu. Sikhetha amalungu amasha azongena ezikhundleni zamalungu amabili asishiyile emhlabeni, namabili ashiye ngenxa yokuba matasa emisebenzini yawo,” kubeka uSwana.
Ube eseshayela ihlombe iNyuvesi YaseThekwini Yezobucwepheshe (DUT), ngokulwa nobugebengu ngendlela yesimanje, kusetshenziswa khona omakhalekhukhwini. “Lolu hlelo olwenziwa ile nyuvesi luhle kakhulu, kodwa ludinga ukuthi uhulumeni angenelele, ukuze luphumelele,” esho.
