ISILO SETHULE IKOMIDI ELISHA
AKHONA DLAMINI
INGONYAMA uMisuzulu kaZwelithini, isithathe isinyathelo sokuqinisa ukusebenza kweNdlunkulu, kulandela ukwethula ikomidi elizobhekelela ukusebenza kwayo.
Leli komidi lihlanganisa amakhosi, izikhulu zendlunkulu kanye namalungu omndeni wasebukhosini, azobamba iqhaza ekuqinisekiseni ukuthi imisebenzi yeNdlunkulu ihamba ngendlela efanele
.Amalungu aleli komidi kubalwa uNdunankulu kaZulu iNkosi uPhathisizwe Chiliza, umkhulumeli weSilo uMisuzulu kaZwelithini noyiBambabukhosi uMntwana uMpiyakhe Buthelezi, iShansela yakaZulu iNkosi uMelusi Zondi, uMntwana Africa Zulu, uMntwana Nathi Zulu, uMntwana Qaphelani Zulu, uMntwana Sizwe Zulu, uMntwana Manqoba Zulu noMntwana Ntethelelo Zulu.
“Leli komidi ilona engizosebenza nalo ezintweni zobukhosi, ezindabeni zaseNdlunkulu nakuhulumeni. Ibona buso okumele nibubone lobu uma kukhulunywa ngekomidi leNgonyama,” kubeka iSilo.
