I-HOLLYWOOD ISAYINE UMPETHA WE-COMRADES

I-HOLLYWOOD isayine abamnkantshubomvu eqenjini layo njengoba kusondela imijaho yeComrades Marathon.
ISITHOMBE : Hollywood bets

MALIBONGWE MAZIBUKO

I-HOLLYWOOD Athletics Club isithathe igxathu lokuqinisa iqembu labagijimi abasezingeni eliphezulu njengoba kusondela umjaho weComrades Marathon ngokusayina abagijimi abadumile abanqobe lo mjaho phambilini, uTete Dijana no-Edward Mothibi.
Laba bobabili bazogijima sebegqoke imibala ehlonishwayo yekilabhu iHollywood Athletics Club, obukhwebezane nophuzi.
UTete Dijana uthe ukujoyina i-Hollywood Athletic Club kuyisinyathelo esikhulu kuye ukuba yingxenye yeqembu eligxile ekunqobeni nasekuthuthukisweni kwemibono eya phambili. Uthe kuyamkhuthaza ukuthi aqhubeke nokuzikhandla nokuzuza okungaphezulu emjahweni iComrades Marathon. UDijana onqobe iMarathon kathathu, noMothibi oseke waba ngumpetha weComrades bangamalunga bekilabhu yokuziqeqesha eyaziwa ngeHappy Bunch yaseRustenburg. Ukufika kwabo Hollywood kuzokwenyusa isithunzi sayo njengelinye lamaqembu anamandla emijahweni yamabanga amade.
Ngaphandle kwalokho, kuyayiqinisa iHollywood eshaya ngabagijimi abasezingeni eliphezulu okubalwa kubona owesifazane onqobe iComrades izikhathi eziningi, uGerda Steyn.
UDijana noMothibi bazophinde bazojoyina uJohannes Makgetla owathola indondo yegolide kwiComrades kanye noRuben Mosiane osakhula ekugijimeni amabanga amade.