KUKHUNJULWA LOLU SUKU OKWAFIPHALA NGALO ILANGA KWAZULU
EMINYAKENI emihlanu eyedlule kwaba usuku olunzima esizweni samaZulu, kufika umzimba weMbube KwaKhethamthandayo.
KUFIKA imoto eyayithwele umzimba weSilo
ISITHOMBE: Business Report
MALIBONGWE MAZIBUKO
NGALOLUSUKU eminyakeni emihlanu eyedlule, isizwe samaZulu sabhekana nesikhathi esinzima nesigcwele usizi , ngesikhathi kufika umzimba weNgonyama, uZwelithini kaBhekuzulu, esigodlweni saKwaKhethomthandayo, kwaNongoma.
ISilo esasesihlale esihlalweni sobukhosi bakwaZulu iminyaka engaphezu kwengama-50, sabusa ngesikhathi esinzima kumlando waseNingizimu Afrika. Uhambo lwaso lokugcina lwathwalwa ngesithunzi esigcwele ukuhlonishwa nobuqhawe.
Amabutho kaZulu agcwala iHlalankosi, ayegqoke imvunulo yesintu, eqinisa isithunzi sokufika komdala esigodlweni.
Izakhamuzi zakwaNongoma kanye nezingxenye ezahlukene zesifundazwe iKwaZulu-Natal, zazibuthene ngaphandle kwesigodlo, zilindele ukufika kweNgonyama. Umoya wokuthula nowosizi wawubusa, kwathi lapho imoto ethwele iNgonyama ifika, kwavela ukukhala nokudabuka okukhulu kubantu.
Amabutho aqhuba umkhuba wesintu wokwamukela iSilo, ekhombisa inhlonipho ephezulu nokugcina amasiko esizwe. Abaholi bendabuko, amalungu omndeni wasebukhosini kanye nezikhulu zikahulumeni babekhona, bezofakaza ngalesi sikhathi esibalulekile emlandweni wesizwe samaZulu.
Ukufika kweMbube kwaKhethomthandayo kwaba ukuqala kwezinhlelo zokugcina zokutshala iSilo endlini yayo yokugcina.
Lesi sigameko sashiya amanxeba ezinhliziyweni zabantu abaningi, njengoba iNgonyama yayiyisibonakaliso sobumbano, amasiko nobuholi obuqinile esizweni.
Namuhla, lolu suku lusaqhubeka nokukhunjulwa njengolwaba ukuphela kwesahluko esibalulekile emlandweni wobukhosi bakwaZulu, kodwa futhi lukhumbuza ngesandla esinamandla iSilo Goodwill Zwelithini kaBhekuzulu asibambe ekwakheni nasekuhlanganiseni isizwe samaZulu.