KUKLONYELISWE OSOMABHIZINISI BASEMALOKISHINI NABASEMAKHAYA KUMA-BBA

UNDUNANKULU waKwaZulu-Natal uMnuz Thamsanqa Ntuli ethula inkulumo.

UNDUNANKULU uMnuz Thamsanqa Ntuli, izikhulu zakwaHollywood Foundation nobaqwaqwade emakhanda wakhala wamuka noR145 000. IZITHOMBE: HOLLYWOOD FOUNDATION

NOMCEBO NGEMA

UNDUNANKULU waKwaZulu-Natal uMnuz Thamsanqa Ntuli, ushayele ihlombe umcimbi wakwaHollywood Foundation, wokuklomelisa osomabhizinisi abancane basemalokishini nabasezindaweni zasemakhaya, obizwa ngeBambelela Business Awards.

UNdunankulu uthi bewuhulumeni wesifundazwe bazibophezele ukusebenza nezinhlangano ezifana noHollywood ukwandisa amathuba, ukucobelela abantu basesifundazweni ngolwazi kanye nokwakha iKwaZulu-Natal eqinile.

AbakwaHollywood Foundation bathi amabhizinisi amancane adlala indima ebalulekile ekuthuthukiseni umnotho wendawo, ukudala amathuba emisebenzini aphinde aqinise intuthuko yomphakathi.
Bathi yingakho beqhubeka nokuzibophezela ekuthuthukiseni amabhizinisi asemalokishini, nawasemakhaya njengoba benenqophamlando yomcimbi obizwa ngeBambelela Business Awards, okungumcimbi wokuklomelisa osomabhizinisi baKwaZulu-Natal.

“Kulonyaka sikhulise utshalomali lokuxhasa lolu hlelo lusuka ku-R1 million lwaya ku-R1 135 000 lokuxhasa osomabhizinisi abangama-20 esifundazweni. Kulonyaka isibalo sezicelo sinyuke safinyelela kwi-128 ziqhamuka kuzona zonke izinkalo zesifundazwe okubalwa uMasipala weTheku, eMpangeni, Richards Bay, Port Shepstone, Greytown, Pietermaritzburg kanye nasOlundi,” kusho Abakwa-Hollywood kwisitatimende.

UVuyisile Ngobese oyi-Public Relations Officer kwaHollywood Foundation, uthi lo mcimbi uyaqhubeka nokwenza okuhle kumabhizinisi asemalokishini nasezindaweni zasemakhaya. “Amabhizinisi amancane alokhu ewumgogodla wokudala amathuba emisebenzini emphakathini,” kusho uVuyisile.