KULIMALE ABASOLWA ABATHATHU KUDUTSHULWANA NAMAPHOYISA
UMBIKO: ZETHU PHOSWA
KULIMALE kanzima abasolwa abathathu, kwathi ababili babaleka kulandela ukududulana namaphoyisa ngezulu lezandla eBhambayi eNanda entshonalanga yeTheku namuhla.
Lokho kuthiwa kwenzeke ngemuva kokuthi amaphoyisa elunywe indlebe, ngalabasolwa ababefunwa ngamacala amaningi okubulala eNanda naseMlazi.
Ngokusho kuka uRobert Netshiunda okhulumela amaphoyisa KwaZulu-Natal usiqinisekisile lesi sigameko.
“Amaphoyisa anikele eBhambayi eNanda, ngemuva kokulunywa indlebe ngomkhondo walaba basolwa. Amaphoyisa agasele khona, okuthe efika abasolwa badubula bebhekise emaphoyiseni, nawo abe esephendisela ngalo izulu lezandla,” esho.
Uthe kulimale kanzima abathathu, kwathi ababili babaleka.
Uthe laba basolwa bathinteka emacaleni okubulwa ukubulala amaphoyisa amabili nabantu abane abadutshulwe endaweni yokucima ukoma eSundumbili.