INKANTOLO NOHLELO LOKUKHIPHA UMENGAMELI ESIKHUNDLENI

UNGAPHANSI kwengcindezi yokwesula esikhundleni uMengameli ngemuva kwesinqumo seNkantolo Yomthethosisekelo esibange amalunga amaqembu ezombusazwe abe nezinkulumo.

IPULAZI likaMengameli iPhala Phala okuyilapho kwantshontshwa khona imali elinganisele kumadola angu-$500 000. IZITHOMBE: GOOGLE

PHUMELELE DLAMINI

IYAQHUBEKA nokukhula ingcindezi kuMengameli wezwe uMnuz Cyril Ramaphosa, ngemumva kokuthi iNkantolo Yomthethosisekelo ithathe isinqumo sokuchitha leso esasithathwe iPhalamende ngonyaka ka-2022, sokungawulandeli umyalelo okwisigaba sema-89 (section 89). Lokhu kulandela ukutholakala kobufakazi obuphathekayo bokuthi uMengameli wephula umthetho ngokutholakala kwemali yakwelinye izwe engu-$500 000, okuyiyona eyantshontshwa ngaphansi kukasofa epulazini lakhe iPhala Phala ngonyaka ka-2020.

Inkantolo ithi iPhalamende lasebenzisa amandla alo ngendlela engekho emthethweni, ngesikhathi kuvotwa ukuvikela uMengameli, ngakho ke kusungulwe ikomidi elizomuphenya ngenhloso yokumukhipha esikhundleni.
Lesi sinqumo sisuse umsindo kumaqembu ezepolitiki ahlukahlukene njenge-ATM, EFF ne-ActionSA afuna uMengameli asule esikhundleni ngokushesha ukuze agxile ekuvikeleni igama lakhe.

“Manje isikhathi lapho uRamaphosa kumele asebenzise unembeza, ngokuthi esule esikhundleni sokuba uMengameli waseNingizimu Afrika, ahambe abhekane nekomidi lokwesula esikhundleni. Asikwazi ukuba noMengameli owenza imisebenzi yobumengameli aphinde abhekane nendaba yokwesula esikhundleni, kumele agxile kokukodwa,” kusho umholi we-EFF, uJulius Malema.

Ngisho nabalingani be-ANC neSACP, bagcizelele ukuthi lolu hlelo kufanele luqale ngokushesha, ukuqinisekisa ukuthi uMthethosisekelo uyahlonishwa futhi akekho umuntu ongaphezu komthetho.