ZINOBUNGOZI IZIMOTO ZE-JEEP GRAND OKUTHIWA AZIBUYISWE ZIZOXILONGWA

KUCELWA kubuyiswe izimoto zohlobo lwe-Jeep Grand Cherokee WL ukuze zixilongwe. ISITHOMBE: FACEBOOK

NOMCEBO NGEMA

I-NATIONAL Consumer Commission isikhiphe isimemezeleo sokuthi kubuyiswe izimoto ezingama-920, zohlobo lweJeep Grand Cherokee WL ezithengiswe phakathi konyaka ka-2021 kuya ku-2023.

Lezi zimoto zibuyiswa ngenxa yenkinga yezokuphepha ehambisana ne-upper control arm pinch bolt engase iphuke, okungaholela ekutheni umshayeli wemoto ahluleke ukuyilawula kwenzeke ingozi enkulu.

UPhetho Ntaba okhulumela iNational Consumer Commissioner, uthi abanikazi bayacelwa ukuthi baye ezikhungweni ezigunyaziwe zakwaJeep ukuze kuhlolwe, kulungiswe noma kushintshwe izingxenye. Uthi lokhu kuzokwenziwa mahhala.