KUZODELA UMAKHASANA KOWE-PRINCE MANGOSUTHU LEGACY CUP NGEMPELASONTO
USOMLOMO uCllr Thembile Memela eqhatha ngokusemthethweni amaqembu azogijimisana kowe-Prince Mangosuthu Legacy Cup ngoMgqibelo.
INDEBE ezokhala yemuke neqembu elilodwa elizonqoba. IZITHOMBE: FACEBOOK
NOMCEBO NGEMA
INTAKA ibekelwe amazolo ngoMgqibelo mhla ziyi-18 kuNtulikazi kwi-Prince Mangosuthu Legacy Cup, njengoba amaqembu azogadulisana kulo mqhudelwano eqhathwe ngokusemthethweni namuhla eGarden Court, Olundi. Lawa maqembu aqhathwe uSomlomo woMkhandlu waseZululand, uCllr Thembile Memela obemele iMeya engakwazanga ukuphumelela uCllr Michael Khumalo.
Amaqembu azogijomisana ngoMgqibelo ePrince Mangosuthu Buthelezi Stadium, AmaZulu azotholana phezulu no-Ulundi United ngehora lesi-9:00 ekuseni, kuthi ngehora le-12:00 emini bebade kubhekane iNsingizini Hotspurs igijimisane neMbabane Highlanders FC (Swaziland derby). Amaqembu amabili azonqoba azobe esebhekana ngehora le-16:00 ntambama kowamanqamu, ozonqoba uzokhala emuke nendondo yalonyaka.
USomlomo uthi ezemidlalo zihlanganisa abantu ngale kokubheka ubulili, ibala, okwenza kwakheka ubungani. “Ezemidlalo ziyithuluzi elidlala indima ebalulekile emiphakathini, ngoba zihlanganisa ngisho osopolitiki abahlukene ngokwamaqembu zibenze babe imbumba uma kudlala iqembu okanye amaqembu athile bayahlangana bajabulele ibhole bonke. Zithuthukisa umnotho wendawo yalapha eZululand okubalwa izindawo zokulala, ezokuthutha, amabhizinisi endawo kuphinde kudaleke amathuba emisebenzi esikhashana,” kusho uSomlomo uCllr Memela.
Uqhube wathi bayaziqhenya ukubona uSiphephelo Sithole oyi-midfielder kwiBafana Bafana ephakamisela phezulu ifulegi lakuleli, kanjalo nelasoNdini. Uthi lokhu kugqugquzela intsha esakhula ethanda ezemidlalo ukuthi nayo ngelinye ilanga ingadlalela iqembu lesizwe noma iphuma endaweni yasemakhaya.
Lo mcimbi ubuhanjelwe umndeni wakwaButhelezi, amaKhosi, izinduna, amakhansela, abamele amaqembu ebhola, uMasipala wasOlundi noMkhandlu waseZululand.