KUTHUTHUKISWA ISIBHAKELA ESISEZINGENI LOMPHAKATHI E-KZN
UMnyango Wezemidlalo, ubuCiko NamaSiko KwaZulu-Natal, uyaqhubeka nokweseka amakilabhu ezemidlalo omphakathi ngenhloso yokuthuthukisa ithalente lentsha nokwakha ikusasa eliqhakazile.ISITHOMBE: KZNDSAC
MALIBONGWE MAZIBUKO
KUQINISWE imizamo yokuthuthukiswa kwezemidlalo ezingeni lomphakathi nokweseka izikhungo ezikhulisa ithalente lentsha.Lokhu kwenziwe uNgqongqoshe woMnyango wezeMidlalo, ezobuCiko namaSiko KwaZulu-Natal, uMnuz uMntomuhle Khawula, neNhloko yoMnyango uDkt Thobile Sifunda, ngesikhathi bevakashele eCarbineers Boxing Gym.
Bathi ngalokhubahlose ukuzibonela mathupha umsebenzi owenziwa kule ndawo, eyokuthuthukisa isibhakela, abadlali abasebancane. Baxoxisane nabaphathi nababambe iqhaza ngezidingo nokuthuthukisa le ndawo. ICarbineers Boxing Gym ithathwa njengenye yezindawo ezibalulekile ezivulela intsha amathuba, okuziveza emdlalweni wesibhakela, ifundise ukuziphatha kahle nokuthi intsha ingabi wuvanzi.UKhawula uthe umnyango uzoqhubeka nokutshala izinsiza ekuthuthukiseni ezemidlalo ezingeni lomphakathi, njengoba kuyizona ezikhiqiza ompetha bakusasa.
“Uma sifuna ukwakha ikusasa eliqhakazile kwezemidlalo, kumele siqale ngokweseka amakilabhu asebenza nsuku zonke emphakathini. Izindawo ezifana neCarbineers Boxing Gym zinikeza intsha amathuba okufeza amaphupho ayo. Ziklama indima enkulu ekwakheni isimilo. Zithuthukisa amakhono angababeka emiqhudelwaneni emikhulu. Sizoqhubeka nokusebenza ngokubambisana nabo bonke ababambe iqhaza, ukuqinisekisa ukuthi akukho thalente elisala ngemuva,” kusho uKhawula.Ugcizelele ukuthi izikhungo zemidlalo nokuxhumana kubamba iqhaza lokwakha indawo yezemidlalo. “Intsha inikezwa amathuba alinganayo okuthuthukisa amakhono ayo, nokufeza amaphupho.
Lolu hlelo luyingxenye yokuzibophezela koMnyango ekuqhubekeni nokwakha iKwaZulu-Natal, lapho ezemidlalo zisetshenziswa khona njengensika yokuthuthukisa intsha. Kuqinisa umphakathi ngokukhiqiza abadlali abazomela isifundazwe nezwe emiqhudelwaneni yasekhaya neyamazwe ngamazwe, ” esho.