KUSOLWA UMCULI WAMA-PIANO NGOKWEBA IMALI YESOSO

UMBIKO: MABUNHLE MLABA

UKHALA uyazithulisa uRethabile oyindodakazi yesihlabani esisanda kushona uWinnie Khumalo, ngemali yesoso likanina, elingazange anuke ngisho isenti kuwo.
URethabile ongumculi ukhala uyazethulisa, ngemali yomnikelo kanina asola ukuthi wamila izinyawo. Uthi umnikelo ugcine ukubonakala kumculi wamapiano uBongani “Mabboza waseTV” Tsime.
Kuzokhumbuleka ukuthi ngesikhathi kuvela izindaba zokushona kukaWinnie ngoJanuary 7, uTsime wayephansi phezulu enxenxa ozakwabo endimeni kaqedisizungu ukuthi baphonse esivivaneni kulungiselelwa umngcwabo. Imithombo iveze ukuthi ibalelwa kuR20 000 imali eyakolekelwa ukungcwaba uWinnie owaduma ngengoma yakhe ethi ‘I wanna leave my life nezinye eziningi’.
Umculi ocele lingadalulwa igama lakhe ngoba engafuni ukuxabana nomsolwa. “Ngesonto eledlule uRethabile usifonenile esitshela ukuthi akakaze ayithole imali yomnikelo kanina. Usitshele lokhu ku WhatsApp group kuzwakala ukuthi unengekile futhi ukhungathekile,” esho.
Uthi kulo mlayezo othunyelwe uRethabile ubhaleke kanje: “Angiqondi manje ukuthi kumele ngenze njani, Sengethule kwanele manje.” Eziphendulela uTsime kwi voicenote ka WhatsApp uthe ayingenanga kuyo imali.
“Imali yafakwa kwi account yomshana wami kodwa ngebhadi wayisebenzisa.” Sekuthintwa uRethabile ngenkulumo kaTsime uthe. “Ngizokwazi ukukhuluma uma sengiwehlisile umoya. Okwamanje ngicela ukungaxinwa kakhulu ngemibuzo.”