LIYAKHULA ISASASA NETHEMBA NGEZINCWADI E-KZN
ABAHOLI besifunda Usiba-Ncamsile Makhambeni District, Mnu Sphamandla Mathaba, Mnu Oscar Zwelihle Mkhize noMnu Sizwe Mabaso
ISITHOMBE: USIBA
Umbukiso wezincwadi ematafuleni.
MUNTOMUHLE MCAMBI
Liya ngokwenyuka ithemba ngekusasa lemibhalo esifundazweni iKwaZulu-Natal njengoba belokhu bevele njalo ababhali abasha abazinze emadolobheni kanjalo nabasemakhaya. Lokhu kufakazelwe umcimbi wokugubha nokuqhakambisa uhlelo lwamazwengamazwe lwe-International Book Week obeluhlelwe lwaqondaniswa nosuku lwezincwadi ngomhla ziyi-08 kuMandulo, eNgwelezane Hall.
Abophiko lwemtapo yolwazi eMnyangeni Wezemidlalo Ezamaciko Namasiko KwaZulu-Natal ngokubambisana noSiba, bathi kuningi abakuhlelele ababhali kuya phambili abafisa kubanjiswane kukho. Kulo mcimbi kuphinde kwethulwa izincwadi zababhali abehlukene okubalwa kubo uThando Mchunu ongumbhali wencwadi esihloko sithi ‘Broken Rose’ noMnu Sizwe Mabaso umbhali wencwadi esihloko sithi ‘Umnkenenezo’.
NgokoSiba isifunda saseKing Cetshwayo siqanjwe ngokuthi Usiba-Ncamsile Makhambeni District kanti abaholi besifunda yibona abahlele le ndumezulu yomcimbi ngokubambisana noMnyango, ngenhloso yokuthuthukisa ababhali bendawo. Lesi sifunda sakhiwe omaspala abahlanu okubalwa kubo: uMhlathuze Local Municipality, uMlalazi Local Municipality, iNkandla Local Municipality, uMthonjaneni Local Municipality neMfolozi Local Municipality.
Lo mcimbi ubuthanyelwe abantu abavela emikhakheni eyehlukene, ababhali, othisha nabafundi bezikole emazingeni aphansi khona eNgwelezane. NgokoSiba kuhlelwa ukuqhakambisa kakhulu nababhali abadabuka ezindaweni zasemakhaya esifundazweni sonke.
