AMAQEMBU AMANE ASE-KZN AZODLALELA I-MOTSEPE LEAGUE
UMBIKO: SAMKELISIWE NOPHUKUZA
KUWAHAMBELA kahle amaqembu amane aKwaZulu-Natal atonyulelwe ukuthi anyukele ku-ABC Motsepe League.
Lokhu kulandela ukugquzulana kwawo kwimidlalo weKZN Men’s Regional Playoffs ebikade isoGwini ezinkundleni UGu Sport& Leisure, Gcilima Sports ground naseMargate Sport School kule mpelasonto. Ingwijikhwebu emnandi eyenzeke kulo nyaka ukuthi lama-play-offs andise isibalo samaqembu aya kwiMotsepe njengoba kunamaqembu amane adlulele phambili kunamabili ajwayelekile. INewcastle Warriors (Amajuba), Tornado FC (King Cetshwayo District), Good Fellas (Harry Gwala), neWartburg United (uMgungundlovu) bazodlulela kwelinye izinga. Amaqembu akhombise ikhono elimangalisayo ebholeni kulomqhudelwano wezinsuku ezimbili. KuGroup A, iNewcastle Warriors ihlule iReal Connection (Ilembe) ngo 5-0, kwathi iVee Jay All Stars (waseZululand) yehlulwa Umzinto FC(UGu) ngo 1-2. KuGroup B iWartburg United (UMgungundlovu) ishaye Umhlabuyalingana FC (Umkhanyakude) ngo 3-0, kwathi iGood Fellas (Harry Gwala) yehlula iCosmos (Umzinyathi) ngo 2-0. ITornado FC (King Cetshwayo District) yiyona ekhonyayo kuGroup C ihlule iGqom Gang (uThukela) ngo 2-0.
Umnyango wezemiDlalo, ezobuCiko Namasiko ubambisene neSAFA, KZN Football Association ne Hollywoodbets ekuvukuzeni abadlali kusuka komasipala beziFunda ukuze bakhule, bathole ithuba lokudlalela amaligi aphezulu.
