OWE-BAFANA BAFANA WENQABE UKUPHAWULA EKA-MOKOENA

UMBIKO: MABUNHLE MLABA

UMQEQESHI weBafana Bafana uHugo Broos wenqabile ukuphawula ngodaba lukaTeboho Mokoena, osematheni ngenxa yokudlaliswa kwakhe kungafanele. Ngaphambi komdlalo wayizolo wokuhlungela i-2026 Fifa World Cup neBenin iBafana Bafana ewunqobe ngo 2-0 e Stade Félix Houphouët Boigny e-Ivory Coast, kuvele ukuthi iNingizimu Afrika isenkingeni ngokudlalisa uMokoena koweLesotho okutholakale ukuthi kwakungafanele ngoba usenamakhadi amathathu aphuzu. UMokoena wabhalwa okokuqala kudliwa iBenin ngo 2-1 ngoNovemba 13 eThekwini, nangesikhathi kushaywa i Zimbabwe ngo 3-1 e Bloemfontein.
Njengoba iLesotho isifake isimangalo ku-FIFA kungenzeka iBafana Bafana ihlawuliswe ngokuphucwa iphuzu. Ecelwa ukuthi aphawule ngalesi simo ngemuva komdlalo neBenin uBroos uthe. “Okwamanje angeke ngikwazi ukugxila ekuphawuleni ngoba udaba lusasetshenzwa,” esho.
Lo mqeqeshi waseBelgium uncome umhlaziyi wemidlalo uSinesipho Mali ngomsebenzi awuchaze njengoncomekayo awenzile.