UKHONJWE INDLELA OWAYEQEQESHA IBAROKA.

ZIMBHEDELE uKgoloko Thobejane kwiGosebo United kowe-ABC Motsepe League.
ISITHOMBE : SuperSport.

MALIBONGWE MAZIBUKO

IQEMBU laseLimpopo elidlala ku-ABC Motsepe League, iGosebo United, selinqume ukuhlukana nowayengumqeqeshi weBaroka FC, uKgoloko Thobejane, kulandela ukuphikwa yimiphumela.
UThobejane, owaziwa kakhulu ngamazwi akhe adumile athi “Football can kill you” (ibhola lingakubulala), waqokwa njengomqeqeshi we-United ngoMandulo 2025 enethemba lokuphakamisa izinga leqembu elizinze eGa-Masemola, ngenxa yolwazi lwakhe olunzulu kuPSL nakwamanye amazinga ebhola lezinyawo. Nokho, izinto azihambanga ngendlela ebilindelwe ku-Stream B.
IGosebo yathenga i-United Artists ekuqaleni kwesizini ka-2025/26, inethemba lokwakha phezu kwendawo yesithupha eyatholwa yi-Artists ngesizini edlule. Esikhundleni salokho, iqembu lizithole selilwela ukuvika izembe ngaphansi kobuholi bukaThobejane.
Njengamanje, iGosebo isendaweni yokugcina ku-Stream B (indawo ye-11) ngamaphuzu ayisishiyagalolunye emidlalweni eyishumi. Kule midlalo, iqembu likwazile ukunqoba kabili, ladlala ngokulingana kathathu, lahlulwa izikhathi ezinhlanu.
Ngokuhamba kukaThobejane, iGosebo izobhekana neDitlou FC kusasa ntambama emdlalweni weligi ozodlalelwa eMafori Mphahlele Stadium eBaroka Village ngo-15:00.