U-LEBO M UZOHLONIPHA UMSHENGU NGENGOMA YENKOSANA

ZETHU PHOSWA

KUZOHLONISHWA ngedili lomculo uJoseph Shabalala ongumsunguli weBlack Mambazo nangengoma yenkosana yakhe uNkosinathi Shabalala ngengoma edidiyelwe uLebo M.
Lo mcimbi uzokuba sePlayhouse eThekwini kusasa ngoLwesithathu uhlelwe uLebo M ongumqondisi womdlalo wasesiteji iLion King ngenhloso yokuhlonipha umsunguli weLadysmith Black Mambazo uJoseph Shabalala osadlula emhlabeni.
ULebo M uqale ngokusebenza ingoma kaNkosinathi Shabalala, aseyipheke isikhathi eside, kulengoma ethi ‘Imisebenzi’, ufake ulozolo lwabaculi abahlukene okubalwa uLebo M, uBig Zulu, uMnqobi Yazo nabanye.
Abaculi abazobe bekhona ePlayhouse kubalwa uNkosinathi Shabalala, uLebo M, uBig Zulu, uKhuzani, uBoity, uBlaq Diamond, uNaima Kay, uMnqobi Yazo, Thee Legacy noPhila Dlozi.
ULebo M uthi ukubone kubalulekile ukuhlonipha umsunguli we Black Mambazo, obe yiqhawe owashiya eyibekile induku ebandla, wafaka iNingizimu Afrika kwibalazwe, yaduma umhlaba wonke.
“Ngokwami ukubona siyizwe ngathi asiwuboni ngokwanele umsebenzi omkhulu owenziwe ubaba Mshengu ngokuphakamisa igama lakuleli emazweni ngomculo wesicathamiya. Ungomunye wabaculi abanohlonze esibe nenhlanhla yokuthi sibakhiqize bayophakamisela phezulu ifulegi lakuleli emazweni. Ube yivulandlela kubaculi abaningi bakithi ingakho ngibona kumfanele ukuthi ahlonishwe ngalolu hlobo, ” kubeka uLeboM
UShabalala, wadlula emhlabeni ngonyaka wezi-2020, uhlonishwa ngeqhaza lokubumba inqanawe yeqembu lesicathamiya okumanje lizigqaja ngokuhlabana ngama Grammy Award amahlanu. Leli qembu lazifaka ebalazweni lomhlaba ngesikhathi licula ndawonye noPaul Simon kanti selike laqopha nabaculi abadumile njengoDolly Parton, Stevie Wonder nabanye.