KUKLONYELISWE ABAFUNDI BASEMLALAZI
IMEYA kaMasipala waseMlalazi uCllr Queen Xulu eklomelisa abafundi baseMlalazi.
IMEYA kaMasipala waseMlalazi nePhini layo uCllr Mbongeleni Ngema beklomelisa uthishanhloko wesinye sezikole eMlalazi. IZITHOMBE: UMLALAZI MUNICIPALITY
NOMCEBO NGEMA
KUBE usuku lwenjabulo nentokozo kothisha nabafundi , bezikole ezakhele uMasipala waseMlalazi, eShowe ngesikhathi iMeya uCllr Queen Xulu ibaklomelisa ngokwenza kahle kwabo kwimiphumela kamatikuletsheni yangonyaka odlule, e- Aloe Lifestyle Hotel izolo.
IMeya ithi isekethe yaseMlalazi iwaqwaqwade omahlanu ekhanda amasekethe akwiSifunda sase-King Cetshwayo, njengoba uthole u90.2%.
Iqhube yathi ngaphansi kukaMasipala waseMlalazi bangama-2250 ababhale izivivinyo zabo, kwaphumelela abangama-2073, abangama-1223 baphase ngo-Bachelor, abangama-616 baphase ngoDiploma kwathi abangama-231 baphasa ngo-Higher Certificate.
IMeya iklomelise abafundi abayishumi nge-voucher ka-R1500 umfundi ngamunye, kwathi abahlanu okuyibona abahambe phambili bahlomula ngomacekeceke bama-laptops azokwenza uhambo lwabo lokufunda lube lula kakhulu.
UDkt Andile Biyela obeyisikhulumi sosuku kulomcimbi utshele abafundi ngokubaluleka kokuziphatha, nokungakhohlwa yilapho bephuma khona uma sebephumelele empilweni.
Kulo mcimbi kuphinde kwahalaliselwa intsha okuthe mayinikwa ithuba lokwenza izincwadi zokushayela yathatha lelothuba.
Bangama-50 abantu abasha abathole izincwadi zabo zokushayela ngokusemthethweni.
Nazi izikole ezidle umhlanganiso ngaphansi kukaMasipala waseMlalazi:
- Eshowe High School
- Bambiswano High School
- Bagibile High School
- Batshazwayo High School
- Gratton College
- Gala High School
- uMphezeni High School
- Ngwenya High School
- Dlozilesizwe High School
- Maqoni High School