ITHEKU SELIBEKE EQHULWINI UKUTHUTHUKISA INGQALASIZINDA YAMANZI

IMEYA uCllr uXaba nePhini likaNgqongqoshe uMnuz Mahlobo bevula ngokusemthethweni Ogunjini Water Treatment Works.

ILUNGA lomphakathi lijabulela amanzi Osindisweni. IZITHOMBE: ETHEKWINI MUNICIPALITY

NOMCEBO NGEMA

IMEYA kaMasipala weTheku uCllr Cyril Xaba ngokubambisana nePhini likaNgqongqoshe wezaManzi nokuHlanzeka, uMnuz David Mahlobo, bahlole inqubekela phambili yamaprojekthi ahlose ukuthuthukisa ingqalasizinda yamanzi nokulethwa kwezidingo emiphakathini.

Bavule ngokusemthethweni i-Ogunjini Water Treatment Works ethuthukisiwe Osindisweni, ngokwandiswa kwamandla okukhiqiza amanzi, kusukela ku-1 megalitre kuya ku-3 megalitres ngosuku. “Siphinde sethula iphrojekthi entsha yepitsi lamanzi (borehole) e-Amaoti, kuward 53, okuyindawo ebhekane nezinselelo zokuhlinzekwa kwamanzi endaweni njengoba ingenawo amapayipi okuxhuma amanzi. UMasipala uyazibophezela ekuthuthukiseni ingqalasizinda yamanzi kanye nokuhlinzeka izidingo zomphakathi,” kusho iMeya uCllr uXaba.