ABAQULUSI BAFISELE ABASUBATHI UHAMBO OLUHLE KWI-COMBRADES MARATHON
INGXENYE yabasubathi baseVryheid abangenele iComrades Marathon.
UCLLR L.W Mtshali efisela abasubathi baseBaQulusini uhambo oluhle. IZITHOMBE: ABAQULUSI MUNICIPALITY
NOMCEBO NGEMA
UMASIPALA waBaQulusi uvalelise abasubathi abazomela lo masipala ngempelasonto kwiCombrades Marathon ngegiya eliphezulu, waphinde wabafisela inhlanhla, abaqhamuka kwiVryheid Athletics Club, neNkamana Athletics Club.
UCllr L Mtshali nguyena obemele iMeya kaMasipala waBaQulusi uCllr Sifiso Mkhwanazi ongakwazanga ukuphumelela ngenxa yokuba matasa ngeminye imisebenzi. UCllr Mtshali ubongele abasubathi ngokuthola leli thuba eliyingqayizivele. “Ukuhlungwa ube yingxenye yeComrades Marathon lokho kusho lukhulu kukodwa. Ngicela nisimele kahle ngempelasonto, niphakamisele phezulu ifulegi laBaQulusi. Nginifisela konke okuhle, niphephe futhi nibe nomjaho eniyohlezi niwucabanga. Nisimele kahle phambili, siyaziqhenya ngani,” kusho uCllr Mtshali.
UMasipala waBaQulusi ube sewupha abasubathi izipho wabafisela indlela enhle.