IZOKUBA MINYAKA YONKE INGEZO YABAQULUSI EFILIDI
IMEYA uCllr Sifiso Mkhwanazi ecuphe isisoka nezinsizwa ebeziswenke ziconsa.
IMENENJA kaMasipala waBaQulusi uNkk S’bonga Dlamini obeyingxenye yomcimbi.
IZINSIZWA zaseFilidi ezingene estaji kwezwakala zizoloza. IZITHOMBE: ABAQULUSI MUNICIPALITY
NOMCEBO NGEMA
USUZOKUBA minyaka yonke umcimbi wokubhunga kwamadoda ngezinselelo, nezingqinamba ezibhekana namadoda nokudodisana kwawo, obizwa ngokuthi Ingezo yaBaQulusi, obungoLwesine, enkundleni yebhola lombhoxo, eCecil Emmett, eVryheid.
IMeya kaMasipala waBaQulusi Cllr Sifiso Mkhwanazi ithe, indlela lo mcimbi othokozelwe ngawo, ubone kunesidingo sokuthi wenziwe minyaka yonke, ngenyanga kaNtulikazi okuyinyanga yamadoda. IMeya uMkhwanazi ichithe usuku namadoda aseBaQulusini, bexoxa ngezinto ezidala ingcindezi, bedodisana njengamadoda futhi izinsizwa beziswenke ziconsa, zizoloza okuyingxenye yokuzigqaja ngokuba ngamadoda nokuhambisa inhlonipho nokugqamisa inhlanzeko.
“Kuyangijabulisa ukubona amadoda ehlangene ngesihle futhi ejabule. Ziningi izinto ezibhekana namadoda afele ngaphakathi angazikhulumi. Lo mcimbi owokuthi sihlale phansi sidodisane, siphinde sichushisane ezintweni eziningi ezizosiyisa phambili. Lo mcimbi wokubungaza amadoda usuzoba minyaka yonke ngoba amadoda azicelele ukungavalelwa ngaphandle kwimigubho eyenziwayo. Akhombisa ukuwujabulela kakhulu lo mcimbi,” kusho iMeya uMkhwanazi.Amadoda athole ithuba lokubukisa nokuqhudelana ngomswenko wabo esteji. Amaqembu amathathu awinile athole imiklomelo. Abaculi ebebenandisa iNkosi Yamagcokama, uThokozani Langa nabanye abaningi.
