IMENYEZELWE NJENGENDAWO EYIGUGU I-CURRIES FOUNTAIN
INKUNDLA yezemidlalo emenyezelwe njengendawo Yamagugu Yesifundazwe (Provincial Heritage Site)
UNGQONGQOSHE UMntomuhle Khawula umemezele ukuhlonzwa kwe Curries Fountain Stadium njengesiyiNdawo Yamagugu Yesifundazwe (Provincial Heritage Site). ISITHOMBE: SITHUNYELWE
AKHONA DLAMINI
ISIHLONZWE njengendawo yamagugu, inkundla
yezemidlalo iCurries Fountain, kulandela ukumenyezelwa ngokusemthethweni njengeNdawo Yamagugu Yesifundazwe, okuyisinyathelo esihlose ukuhlonipha umlando wale ndawo ikakhulukazi kwezemidlalo, emasikweni nasemzabalazweni wokulwa nobandlululo.
UNgqongqoshe wezeMidlalo, ubuCiko namaSiko KwaZulu-Natal, uMntomuhle Khawula, uthe usamukela ngezandla ezimhlophe lesi sinqumo esenziwe yiKwaZulu-Natal Amafa and Research Institute .
“ICurries Fountain Stadium ingaphezu nje kokuba yinkundla yezemidlalo. Iyinqolobane ephilayo yohambo lwaKwaZulu-Natal, kusuka esikhathini sobandlululo kuya esifundazweni esinombuso wentando yeningi, esiqinile nesibumbene esiphilisana kahle,” kusho uKhawula.
Kuzokhumbuleka, ukuthi le nkundla yaqanjwa ngomthombo wamanzi owawuzinze eThekwini, owahlonzwa kule ndawo ngonyaka ka-1878, yaze yaqokwa ngokusemthethweni njengendawo yezemidlalo ngo-1924. Ngokuhamba kweminyaka, iCurries Fountain yaba yindawo esetshenziselwa ezemidlalo ezahlukahlukene, imicimbi yomphakathi nezokungcebeleka.
UKhawula uqhube wathi ukumenyezelwa kweCurries Fountain njengendawo yamagugu akugcini nje ngokuhlonipha umlando wesakhiwo, kodwa kubuye kwakhumbuleka yonke imilando exhumene nale ndawo.
