ISILO SIHLAMBULULE IZIHLALO ZAMAKHOSI

INDLULAMITHI uMisuzulu kaZwelithini. IZITHOMBE:KZNCOGTA

UNGQONGQOSHE uMfundisi Thulasizwe Buthelezi ngesikhathi ethula inkulumo.

NOMCEBO NGEMA

KONKE kuhambe kahle kumcimbi wesiko lokuhlambulula izihlalo zamakhosi asekhotheme, ngaphambi kokuthi amakhosi amasha athathe izihlalo zoyise.
INdlulamithi uMisuzulu kaZwelithini kube yiyo eyenze leli siko, ebelenziwelwa esigodlweni saso iSilo eMashobeni, oPhongolo izolo.
UNgqongqoshe woMnyango wezokuBusa ngokuBambisana neziNdaba zoMdabu KwaZulu-Natal, uMfundisi Thulasizwe Buthelezi uncome ukubambisana okubekhona phakathi kweNdlunkuku noMnyango.
Uthi ngaphambi kokuthi iSilo siqalise leli siko, kuqalwe ngohlelo lokuhlonzwa kwamakhosi azohlala ezihlalweni.
“Siyathokoza kubantwana basendlunkulu ngokubambisana nabasebenzi bomnyango ngesikhathi kuhlonzwa amakhosi. Sithokoza kakhulu kwiSilo esikhulu ngokuvuselela lolu siko olubaluleke kangaka, njengoba ingekho inkosi okufanele ihlale esihlalweni ingadlulanga kulo,” kusho uShenge.
Ube esebongele amakhosi enzelwe usiko wathi yiwo angabavikeli besihlalo kuqala.
Uveze ukuthi lolu siko ngolokuhlambulula izihlalo zamakhosi asuke esekhotheme ngaphambi kokuba kuthathe amakhosi amasha.

Sethula inkulumo yaso iSilo sinxuse amakhosi abenzelwa usiko lokuthela amanzi ukuthi angahambeli kude naso. “Nibaluleke kakhulu eNdlunkulu ngakhoke ningahambeli kude nami. Noma sineminye imikhosi efana noyokweshwama ibani khona njengamakhosi aseNdlunkulu,” kusho iSilo.

Amakhosi abe esebonga iSilo ngokusixoshisa ngamaguqa nangezipho ezahlukene.