KUHLONISHWE ABESIFAZANE NGAMAGALELO KUMAFA-GUGU

UNGQONGQOSHE wezeMidlalo, ezamaCiko namaSiko KwaZulu-Natal uMnuz Mntomuhle Khawula ethula inkulumo, emcimbini obuhlelwe kuzwe lonke..

UMNTWANA uTobhi Zungu ngesikhathi ehlonishwa ngamagalelo akhe okukhuthaza izintombi ukuba zizigcine.

USOLWAZI uNomagugu Ngobese weNomkhubulwane Foundation.
IZITHOMBE: SANDILE MAKHOBA

NOMCEBO NGEMA

ABAKWA-National Heritage Council ngokubambisana noMnyango wezeMidlalo, ezamaCiko namaSiko KwaZulu-Natal bahloniphe abesifazane abahlanu KwaZulu-Natal ngezindondo, izitifiketi nemali engango-R10 000 owesifazane ngamunye. Lokhu kwenzeke izolo e-The Station Drive eThekwini.

Laba besifazane bahlonishwe ngamagalelo abo amahle abawenzayo ukulekelela umphakathi, ekuthuthukiseni nasekubambeni iqhaza ekutshaleni umgogodla womuntu omnyama okubalwa ukulondoloza okungamafagugu, nokugqugquzela isiko.

UNgqongqoshe wezeMidlalo, ezamaCiko namaSiko KwaZulu-Natal uMnuz Mntomuhle Khawula, uthi laba besifazane bakwazile ukubeka iKwaZulu-Natal kwibalazwe, ngokuqhakambisa amafagugu ngesiko.
Ube esebongela abesifazane ababe senhlanhleni yokuhlonishwa wabakhuthaza ukuthi baqhubeke benze okuhle.
“Njengoba namhlanje kuhlonishwa laba besifazane akukhona ukuthi sekungokokuqala, nokokugcina kodwa ngokuzayo futhi siyobe sihlonipha abanye besifazane. Muhle kakhulu umsebenzi owenziwa abantu besifazane kulesifundazwe. Ngiyazi ukuthi akubona bodwa laba besifazane enibabizile abenza kahle, kodwa baningi kakhulu, ukuba nibabize bonke ngabe akukho ngisho indawo yokunyathela lana. Abantu besifazane KwaZulu bayahlonishwa ngoba baneqhaza elikhulu abalidlalayo elibalulekile,” kusho uNgqongqoshe.

Abesifazane abahlonishwe kubalwa
uSolwazi Nomagugu Ngobese wakuMkhandlu uMgungundlovu,
uNksz Nomthetho Sibisi- wakuMkhandlu iZululand,
uNksz Caroline Smart – wakuMkhandlu iTheku, uNksz Lungile Dlamini wakuMkhandlu iTheku
noMntwana Tobhi Zungu wakuMkhandlu iZululand