INSINGIZINI IPHINDE YABA NGOMPETHA BE-MANGOSUTHU CUP
INGOMPETHA bendebe ye-Prince Mangosuthu Legacy Cup 2026, INsingizini Hotspurs.
INSINGIZINI Hotspurs inqobe Ulundi United kumaphenathi. IZITHOMBE: NSINGIZINI HOTSPURS
AKHONA DLAMINI
IVIKELE isicoco sePrince Mangosuthu Legacy Cup 2026, iqembu lebhola laseSwazini, iNsingizi Hotspurs, njengoba iphinde yanqoba lo mqhudelwano, obusePrince Mangosuthu Buthelezi Stadium, izolo. Lo mdlalo uphele zibambene ngo 1-1 ngesikhathi esijwayelekile, kwaphoqeleka ukuthi kudlulelwe kumaphenathi. IHotspurs igcine inqobe ngo 5-4 kumaphenathi.
IHotspurs ifinyelele kowamanqamu ngemuva kokwehlula iMbabane Highlanders AM FC, kumaphenathi ngemuva kokuthi umdlalo uphele zibambene ngo 0-0. emdlalweni wesibili wosuku. I-United izibekisele indawo kowamanqamu ngokwehlula
AmaZulu ngo 2-0 emdlalweni wokuqala wosuku. IMeya yase-Zululand Michael “Mkhonyovu” Khumalo, ibongele iNsingizini, yabhonga nomndeni kaShenge“Ngibongela iqembu iNsingizini ngokuthatha indebe, impela basebenzile abafana. Ngibonge neNkosi yakwaButhelezi impela siyabonga Shenge, ngokuqhubeka nokusinika imvume yokusebenzisa igama loMtwana wakwa-Phindangene. INkosi ibihlale inathi siwuqala lo mcimbi uze uyophetha,” kubeka uKhumalo.