ITHEKU LETHULE AMAPROJEKTHI OKUTHUTHUKISA IZINGQALASIZINDA E-OUTER WEST
IMEYA yeTheku uCllr Cyril Xaba, yethula amaphrojekthi amasha okuqinisa ukulethwa kwezidingo e-Outer West. ISTHOMBE: THULI DLAMINI
LINDELWA MAGWAZA
KULOKOZA inhlansi yethemba kwizakhamuzi zaKwaNyuswa, KwaNgcolosi, eMbo naseMaphephetheni, njengoba uMasipala weTheku uthule amaprojekthi amasha engqalasizinda ahlose ukuthuthukisa ukuhlinzekwa kwezidingo kule ndawo.
IMeya yeTheku uCllr Cyril Xaba yethule amaprojekthi okubalwa ukwandiswa kwedamu lamanzi laKwaNqetho, ukugandaywa komgwaqo uQhuzwini Road nokunikezwa kwezindlu kulabo abasohlwini. “Idolobha lizoqhubeka nokutshala imali ekuthuthukiseni ingqalasizinda yamanzi nemigwaqo, ukuze kuthuthukiswe izinga lempilo yezakhamuzi. Kunohlelo lokwakha elinye idamu lamanzi KwaNyuswa, ukuze kubhekwane nezinselelo zokuhlinzekwa kwamanzi,” kubeka iMeya uXaba.
Ngemuva kokwethulwa kwala maphrojekthi, ubuholi bedolobha buhlangane nomphakathi, ukuze buchaze ezinye zezinhlelo zentuthuko ezihlelelwe indawo nokuxoxa ngezidingo ezithinta izakhamuzi.