UHLOMUKA UKHALA NGABAZALELA ABOKUFIKA ABAKULELI NGOKUNGEMTHETHO

UNGQONGQOSHE woMnyango wezeMfundo KwaZulu-Natal uMnuz Sipho Hlomuka ephawula ngodaba lwabokufika kuleli. ISITHOMBE: KZNOTP

ANELE ZUMA

UNGQONGQOSHE wezeMfundo kwaZulu Natali uMnuz Sipho Hlomuka, ugxeka abesifazane abakha ubudlelwano nabokufika abahleli ngokungemthetho eNingizimu Afrika
baze babe nabantwana. Lokhu ukuveze ngesikhathi ekhuluma emhlanganweni woMkhandlu Wobumbano Lomphakathi Nokuvuselelwa Kokuziphatha ( Social Cohesion and Moral Regeneration Council) ngoLwesithathu e-Archie Gumede Conference Center, eMayville.

Njengengxenye yezingxoxo ezithintwe umkhandlu , udaba oluke lwaba sematheni lwase-Addington Primary School lusetshenziswe njengesibonelo ezinkingeni isifundazwe esibhekene nazo.
Lokhu kuthathwe njengophawu lokuthi iziphathimandla zakuleli zisadinga ukuhlanganisa amakhanda ukuqinisekisa imithetho emiphakathini kanjalo nokuvikela abantwana abasafunda, ngaphandle kokuphazamisa imigomo nemithetho elandelwayo.

“Ngiyahambiselana nelokuthi abokufika abahleli ngokungemthetho kuleli kumele bebuyele kwelakubo, kodwa okubuye kungikhathaze izinga labesifazane abanabantwana nalaba abahleli ngokungemthetho, ngoba kuzo lezizinxushunxushu zokufunda kwabantwana abanabazali abangenawo amaphepha kuyabalulaza kakhulu,” kuphawula uMnuz Hlomuka.

UHlomuka uqhube wathi izinkinga ezifana nalezi ziyadinga ukufakelwa iso elibukhali ukuze kuphume isisombululo esiphusile, okuyinto ezodingidwa yilabo abamele intando yeningi maduze.