ISILO SIYAPHEKA SIYATHULULA SESIQOKE UBUHOLI BAKWAZULU
UMntwana Thulani Zulu, iSilo uMisuzulu noMntwana iNkosi Zuzifa Buthelezi.
UMBIKO: ZETHU PHOSWA NO-AKHONA DLAMINI
ISILO uMisuzulu siyapheka siyathulula kubuholi asebenzisana nabo eNdlunkulu kaZulu, lokhu kulandela ukuthi iNdlulamithi iseqokele izikhundla ezimbili ezibalulekile ebukhosini, okubalwa iNkosi uZuzifa Buthelezi noMntwana uThulani Zulu. INkosi uMntwana uZuzifa uqokelwe ukuba uSihlalo woMkhandlu weSilo kaZulu, kwathi uMntwana uThulani Zulu, waqokwa ukuthi abe umkhulumeli waso iSilo, iNdlunkulu kaZulu noBukhosi bakaaZulu.
Ukuqokwa kwendodana yalowo owayenguNdunankulu kaZulu uMntwana uDkt Mangosuthu Buthelezi ongasekho, owama emele ukuthi iSilo uMisuzulu sihlale kulesi sihlalo, ngemuva kokwebuza kweSilo uZwelithini kaBhekuzulu. INkosi uZuzifa kubonakala kuzohokozise umndeni kaShenge ukuqokwa kwakhe, oke washaya amakhala ngokuqokwa kukaMfu Thulasizwe Buthelezi owaphums kwesokuba uNdunankulu kaZulu, okukwathiwa uyigazi likaShenge.
UMntwana Thulani Zulu waseZibindini, wayenguMkhulumeli weSilo uZwelithini kaBhekuzulu neNdlunkulu kaZulu.
Kuthe sekungena iSilo esibusayo wathatha isinqumo sokuyosebenza kuMkhandlu wesiFunda iKing Cetshwayo.
Lokhu kumenyezelwe okubonakala kubalulekile, nokuchazwe njengemisebenzi ebaluleke kakhulu ezoqinisekisa isithunzi, ubumbano nefa lamasiko esizwe samaZulu.
Inkosi Yesizwe sakwaButhelezi uZuzifa uphinde wagixabezwa ngokuba Uhlaka olujutshwe ukweluleka iSilo ngezindaba zamasiko, ukubusa nobumbano lwesizwe.
UMntwana uThulani Zulu, ungumuntu ohlonishwayo kwezokuxhumana nezokuxoxisana nobukhosi uzosebenza njengoMkhulumeli Osemthethweni omele indlunkulu kanye noMbuso kukho konke ukuxoxisana nomphakathi kanye nezokuxhumana nabezindaba. Ukuhlanganisa ukuphatha imiyalezo yomphakathi, imithetho nokugcina ubuqotho bezwi lobukhosi bakwaZulu kuzo zonke izinkundla zokuxhumana.
