ISILO SINYUSELWE ISABELO MALI SAYA KU-R93.5 MILLION

INDLUNKULU kaZulu inyuselwe isabelo mali. ISITHOMBE: KZNDSAC

LINDELWA MAGWAZA

INDLUNKULU kaZulu inyuselwa isabelo mali saya ku-R93.5 million, kulo nyaka wezimali ka-2026/27, uma siqhathaniswa no-R89.1 million eyayabelwe wona ngonyaka odlule. UNdunankulu waKwaZulu-Natal uMnuz Thamsanqa Ntuli, umemezele lokhu ngesikhathi ethula isabelo mali sakulonyaka izolo, eSishayamthetho saKwaZulu-Natal.

UNdunankulu uthi le mali izongena ngaphansi kweZulu Royal Household Trust, exhasa ukusebenza kweSilo uMisuzulu kaZwelithini, iNdlunkulu nemisebenzi yaseBukhosini.

Uthe ukwesekwa kweNdlunkulu kuyingxenye yemizamo kahulumeni yokuqinisa ubuholi bendabuko, ukulondoloza amasiko nenqubekela phambili yobumbano emphakathini.Ukukhushulwa kwalesi sabelo mali kuyingxenye yezimali ezabiwe iHhovisi likaNdunankulu ngaphansi kohlahlomali lonyaka wezimali ka-2026/27.