UMUNYU KUBUYA IZINGANE (2) EBEZITHUNJWE E-MALAWI

OWAMI THABETHE

KUBE intokozo enkulu emndenini obewuthunjelwe izingane zawo ezimbili e-Eastern Cape, obusuphelelwe ithemba lokuthi usazozithola lezi zingane zamantombazane ezimbili, ezineminyaka eyi-9 neyi-15 ubudala, ebezithunjwe eMalawi.

Lezi zingane kuthiwa zahlengwa yiziphathimandla zaseMalawi, mhla ziyi-9 kuNtulikazi 2026, kulandela izinsolo zokushushumbiswa ngabantu.
Lezi zingane zabekwa endaweni ephephile ngaphansi kokunakekelwa kweziphathimandla zaseMalawi, uMnyango wezokuThuthukiswa koMphakathi kuleli ne-Interpol nohulumeni waseMalawi.

Lezi zingane kuthiwa ziyingxenye yomndeni , okuthiwa wahehwa wasuka eNingizimu Afrika, waya eMalawi ngoMfumfu ngonyaka odlule, ngezithembiso zempilo engcono.

Amaphoyisa athe kwathi ufika lo mndeni waphucwa amaphasipothi, bavalelwa, bancishwa nokudla.

Unina wezingane nogogo, badedelwa babuyela kuleli, kwathi amantombazane amabili asala ngemuva eMalawi.

UNgqongqoshe woMnyango wezokuThuthukiswa koMphakathi uNksz Dina Pule, uthe lesi sigameko siyisibonelo esicacile sokuthi izinsolo zokushushumbiswa kwezingane akufanele zithathwe kancane.

“Njengamanje lezi zingane seziphephile futhi zizolulekwa ngokwengqondo, zisizwe zize zilulame,” kuchaza uPule.
Unxuse umphakathi ukuthi uma kuduka izingane, babike ngokushesha emaphoyiseni noma ku-Childline.