I-KZNDSAC YENZE EZIBUKWAYO EMQHUDELWANENI KAZWELONKE

ABE KZNDSAC Tennis emidlalweni eMbombela.

AKHONA DLAMINI

UMANGAZE abaningi uMnyango wezemiDlalo, ezobuCiko Namasiko waKwaZulu-Natal (KZNDSAC), uqwaqwada emakhanda ezinye izifundazwe emqhudelwaneni wabasebenzi bakahulumeni kuzwelonke, i-National Public Servants Sports and Cultural Events Tournament (NPSSCE). Le midlalo ebigubha iminyaka engama-30 yasungulwa, ibiseMbombela eMpumalanga.

I-KZN iqophe umlando njengoba ifike ingamathwasa ezingeni likazwelonke, yanqoba kwi-volleyball, ibhola lezinyawo labesifazane, i-chess nethenisi.Ebholeni lezinyawo labesifazane iKZN ihlale esicongweni ngemuva kokwehlula izingqwele zaseGauteng ngo 5-3 kumaphenathi emdlalweni wamanqamu obushubile.

Kowamanqamu weVolleyball labesilisa kunqwamane ezaKwaZulu-Natal kwagcina kuwine iKZNDSAC, ihlula iMnambithi TVET College emdlalweni oshubile ngo 2-1. Ngaleso sikhathi, iqembu labesifazane leVolleyball lithole indawo yesithathu ngemuva kokushaya uMnyango wezeMidlalo, ezobuCiko namaSiko waseGauteng.Kwi-chess abesifazane babuye negolide, abesilisa baphuma isine, iKZN ithole isiliva uma sekuhlanganiswe yonke imidlalo.

Kwithenisi kubuywe nendondo yethusi lapho u-Ayanda Mdlalose emenyezelwa njengowesithathu kwabavelele.UNonhlanhla Myeni obehola iqembu lesifundazwe uncome indlela i-KZNDSAC efike yamela ngayo iKZN.

“Kuyakhuthaza ukuthi sithi siqala ukuyodlala kuzwelonke sifike siwine. Le midlalo iyingxenye yokubambisana okubhekelela ukuthi nabasebenzi bazivocavoce, baphile kahle. Zonke lezi zindondo ziwumsebenzi omuhle owenziwe ukuzinikela kwabaqeqeshi nabadlali,” esho kanje.