ISILO SIQINISE AMAXHAMA NOBUKHOSI BAPHESHEYA
ISILO uMisuzulu kaZwelithini nenkosana yasebukhosini base-UAE besayinda isivumelwano sokusebenzisana. ISITHOMBE: Facebook
NOMCEBO NGEMA
ISILO Samabandla uMisuzulu kaZwelithini uvakashele e- United Arab Emirates (UAE) ngenhloso yokwakha ubudlelwano neminye imibuso.
ISilo sibonane nenkosana yakhona uSheikh Alhassan Bin Ali AI-Nuaimi esigodlweni i-Ajman.
Lolu hambo lweNdlulamithi luyingxenye yokwenza ubudlelwano neminye imibuso yamakhosi akwamanye amazwe. Kulezingxoxo kuzobhekwa kakhulu intuthuko yezomnotho nokuthi lobu bukhosi bungatshalani esizweni samaZulu. Kuvele ukuthi lobudlelwano buzoqhubeka kuze kube noshintsho emikhakheni ehlukene okubalwa ezolimo, ezamandla, ezokuvakasha nengqalasizinda. Ngokwesitatimende esifakwe kwikhasi leNdlulamithi uMisuZulu kuFacebook sithi ukuvezile, ukuthi ukuqiniswa kwamaxhama alobu budlelwano kuzokuba nezithelo ezinhle.