KUMENYEZELWE IQEMBU LABESIFAZANE LE-KAIZER

IKAIZER Chiefs izophenduka iqembu lesine kwiPSL elineqembu labesifazane.
ISITHOMBE: Kaizer Chiefs

MALIBONGWE MAZIBUKO

IQEMBU elikhulu laseSoweto, iKaizer Chiefs, seliqinisekise ngokusemthethweni ukusungulwa kwelabesifazane, iKaizer Chiefs Ladies, emcimbini obubanjelwe e-Ekurhuleni ngoLwesibili.
Leli qembu elisha lizodlala kwiSasol League, okuyiligi yesigaba sesibili esingezansi kweHollywoodbets Super league. IChiefs izoba yiqembu lesine elidlala kwiBetway Premiership elinelabesifazane, ilandela iMamelodi Sundowns, TS Galaxy neStellenbosch abanamaqembu ayibamba kwiHollywoodbets. I-Orlando Pirates inobudlelwane nelase-University of Johannesburg.
Ngokwesitatimende seqembu, ukusungulwa kweKaizer Chiefs Ladies kukhombisa ukuzibophezela okuqinile kwalo ekuthuthukiseni ibhola labesifazane, ukudala amathuba kubadlali, kanye nokweseka ukukhula komdlalo kuleli.
Iqembu elisha liqukethe abadlali abangu-24, abahlanganisa abanolwazi nabasafufusa, kanti phakathi kwabo kukhona umdlali ovelele uMamello Makhabane oseke wadlalela iTS Galaxy Queens futhi engumdlali osehlonishwayo kwiBanyana Banyana.
Iqembu lizoholwa ngumqeqeshi u-Unathi Mabena owayengumsizi womqeqeshi kwiJVW FC futhi ophethe ilayisensi ye-UEFA B, kanye nolwazi lokusebenza namaqembu esizwe entsha.
IChiefs iphinde yamemezela ukuthi imidlalo yasekhaya yeqembu labesifazane izobanjelwa eKaizer Chiefs Village kanye naKwa-Thema Stadium, eSprings.
Iqembu liphinde lagcizelela ukuthi lesi sinyathelo asigcini ngokungena kwiligi kuphela, kodwa siphinde sihloniphe umsebenzi owenziwe iminyaka eminingi ngabantu abafana noJoseph Mkhonza owayengumqeqeshi nomsunguli weSprings Home Sweepers okuyiyona eyisisekelo seKaizer Chiefs Ladies.