ISIMANGALISO SIDALE AMATHUBA EMISEBENZI
INKOSI uNtokozo Mkhwanazi ngesikhathi ehambele umcimbi wokwethulwa lokutshala izimali eSt Lucia. IZITHOMBE: ISIMANGALISO Wetland Park
OWAMI THABETHE
KUZOHLOMULA umphakathi owakhelene ne-Isimangaliso Wetland Park, kulandela ukuthi isikhulu esiphezulu uMnuz Sibusiso Bukhosini, ethule uhlelo okuzohlomulisa umphakathi ngokuba iqhaza kwezokuvakasha kule ndawo.
UBukhosini ukusho lokhu ngesikhathi kwethulwa amaprojekthi ahlukahlukene, azothuthukisa indawo yezokuvakasha iSimangaliso Wetland Park, eSt Lucia eMpukunyoni eMtubatuba mhla ziyi-12 kuMfumfu. Wethembise ushintsho lokwenza umehluko emphakathini, nokudala amathuba emisebenzi, ukulethwa kwezinsiza nasekuthuthukisweni kwengqalasizinda, ukuze kugcineke lendawo yezokuvakasha nokuncebeleka ihambe phambili.
Ugcizelele ukuthi lolu hlelo olusha luhlose ukuguqula indlela i-iSimangaliso Wetland Park esebenza ngayo, ithuthukise izinsiza nengqalasizinda ukuze kuzuze umphakathi nezivakashi. Kuzokwamukelwa abatshali zimali abazokwakha amahhotela, ama lodge nezindawo zokudlela kulepaki.
“Abalimi bendawo nabo bazothola ithuba lokutshala mase beyadayisa ukuziphilisa, lena imizamo yethu yokuqinisekisa ukuthi wonke umuntu uyahlomula kulolu hlelo”, kusho uBukhosini.Abaholi bendabuko okubalwa amakhosi nezinduna zaseMkhanyakude beziyingxenye yalomcimbi futhi balwamukele ngezandla ezifudumele lolu tshalomali.
Inkosi uNtokozo Mkhwanazi yaseMtubatuba, ithe leli igxathu elikhulu elizohlomulisa izakhamizi zakulendawo futhi kuzokhulisa umnotho wendawo.
“Singabaholi balesizwe kuyasijabulisa ukubona inqubekela phambili esizweni sethu. Ngicabanga ukuthi bonke abantu bazokujabulela lokhu njengoba kuzovula amathuba emsebenzi nawokuhweba, “kusho iNkosi uMkhwanazi.
