ISILO SIZOTHUTHUKISA I-KZN NGESIVUMELWANO NENKAMPANI YEZAKHIWO
AKHONA DLAMINI
ISILO uMisuzulu kaZwelithini usayine isivumelwano nenkampani yezakhiwo yaseMelika i-NYCE, ngenhloso yokuthuthukisa indawo engama-acre ayi-2 500 KwaZulu-Natal, ngephrojekthi elinganiselwa ezigidini eziyi-US$1 billion ngamadollar aseMelika.
Le phrojekthi ihlose ukwakha izindawo zokuhlala, zemfundo ephakeme, ezobuchwepheshe, ezamabhizinisi nezikhungo zamandla elanga. Kuthiwa le ntuthuko izoba semhlabeni ongaphansi kwe-Ingonyama Trust. Umphathi omkhulu we-NYCE, uPhilip Michael Shange, kulindeleke ukuthi anikezwe igunya lokuqongelela utshalomali oluvela eMelika, nokuhola ekuthuthukisweni kwale phrojekthi isikhathi esiyiminyaka engama-49.
