UKHUZA IBUYA OWESIBHAKELA ETHEKWINI

UPRINCE “Demon” Dlomo no noPhumelele “The Fireman”Ngcobo abazobhekana empini ezoba seThekwini ngoNhlolanja.
ISITHOMBE : SITHUNYELWE

MALIBONGWE MAZIBUKO

UMDLALO wesibhakela ukhuza ibuya ngempi ebhekwe ngabomvu phakathi kukaPrince “Demon” Dlomo noPhumelele “The Fireman” Ngcobo ezoba ngoLwesihlanu zingama-28 kuNhlolanja 2026, e-APN Portuguese Hall, eCongella, eThekwini.
Le mpi ehambisana nezinye ezisezingeni eliphezulu, zihlelwe ngokubambisana yiSiyathaba Boxing Promotions, iLightning Promotions kanye neMKS Boxing Promotions, ngokwesekwa uMnyango weseMidlalo, ubuCiko namaSiko KwaZulu-Natal.
UNgcobo, okleliswe endaweni yesine (4) ezilinganisweni ze-SA Welterweight, uzongena eringini enerekhodi elihle lokungahlulwa ezimpini eziyisihlanu zilandelana. Ngakolunye uhlangothi, uDlomo, owayengumpetha weSA Junior Welterweight, ubheke ukubuyela ezingeni lakhe ngokunqoba.
Ngaphandle kwale mpi enkulu, kukhona ezinye izimpi ezihehayo nezizodonsa amehlo abalandeli besibhakela.