UKHUZANI UHLOMULE NGENDONDO KWELAMANGISI
UKHUZANI uhlonishwe ngomklomelo e-OXFORD, e-Uneted Kingdom.
IZITHOMBE: FACEBOOK
AKHONA DLAMINI, OWAMI THABETHE noMZWANDILE MHLONGO
UMCULI kaMasikandi, uKhuzani Mpungose, usaqhubeka nokuphakamisa ifulegi lomculo kamaskandi, nesiko lamaZulu ezingeni lomhlaba jikelele, kulandela ukuhlonishwa ngendondo e-Oxford, e-United Kingdom.
UKhuzani, odume ngelika Khuba neleNdlamlenze kwezomculo, uhlomule ngendondo yeCultural Icon in Maskandi Music Award, emcimbini iNelson Mandela Leadership Awards & Diplomatic Summit, e-Oxford.
Le ndondo idluliselwe kuye yiMeya yase-Oxford phambi kwabaholi, osomabhizinisi nezihambeli ezihloniphekile ebezithamele lo mcimbi.
UKhuzani ubonge abalandeli bakhe ngokumeseka njalo ohambweni lwakhe lomculo.
“Impumelelo yami iyingxenye yohambo engiluhamba nabalandeli bami, ngakho-ke akuhlonishwanga mina kuphela kodwa nabathandi bomculo wami. Ukuhlonishwa kwami iNyuvesi yase-Oxford kuyinto engasoze yalibaleka nasemlandweni kaMaskandi,” kusho uKhuzani.
Kuvuke igidigidi ezinkundleni zokuxhumana abaculi baMaskandi beziqhenya bethi nawe Ningizimu Africa awumncinyane! Ukuhlomula kukaKhuzani ngendondo kuza ngemuva kokuthi ehole umcimbi omkhulu kwaBulawayo, eZimbabwe, mhla zi-5 kuMandulo, lapho ehambele khona umcimbi wokukhumbula iSilo uMzilikazi kaMashobane.
Le ndondo yengeze eqoqweni lemiklomelo engaphezu kwengama-25, uKhuzani aseke wayithola emsebenzini wakhe womculo, okubalwa kuyo nemiklomelo ahlomula ngayo eMelika nyakenye kuma-Hollywood and African Prestigious Awards.
