ISIYOGANA INDUNA YEZINTOMBI ZOMHLANGA

INDUNA yezintombi jikelele uMningi Zuma ngesikhathi kuqhubeka uMkhosi woMhlanga eMashobeni ngoMgqibelo.
ISITHOMBE: UMUSA MEDIA

OWAMI THABETHE

INDUNA yezintombi jikelele uMningi Zuma, ihole izintombi okokugcina ngci eMhlangeni, esigodlweni eMashobeni mhla ziyi-12 no-13 kuMandulo, njengoba iphethe ngokuxhawula eSilweni isivalelisa ngaphambi kokuyogana.

INduna ihole izintombi eziyinkulungwane imnyaka engaphezu kwesiyihlanu, ngesikhathi kusabusa iSilo esabuzayo uZwelithini kaBhekuzulu nangesikhathi seSilo uMisuzulu kaZwelithi.
UMningi uvalelisa emhlangeni nje uselotsholiwe waqedwa njengoba sekulindwe usuku lomshado, oluzoba ngoMbasa ngonyaka ozayo, kanti umkhehlo ungoLwezi kulo nyaka.

Ubonge izintombi ezivela kuzo zonke izifunda nezifundazwe, nakwamanye amazwe ezibambe iqhaza kulo mkhosi ngokumela isiko likaZulu ngokuziphatha kahle esizweni.

Uthe umkhosi wanonyaka ubaluleke kakhulu kuye njengoba kungowokugcina ewuhambele njengentombi.

“Siyabonga kakhulu kuzo zonke izintombi ezize kulo mkhosi, zizokhuleka neMbube. Nibonise uthando lwangempela ngamasiko ethu. Ukuzigcina kwenu kuyisiqinisekiso sekusasa eliqhakazile lesizwe samaZulu, ukuziphatha kahle akusoze kwaphuma esitayeleni,” kusho iNduna uZuma.

UMningi uvaleliswe ngezipho ezivela eNdlunkulu kanye nezinye izintombi ebezivalelisa nonyaka eMhlangeni njengoba seziyogana.

Ugixabeza Indlunkulu ngezipho, kwathi uyise wotha iSilo uMisuzulu ngenkomo.