ISUNDOWNS YABESIFAZANE IDLULELE KOWAMANQAMU KWI-CAF
LADIES idlulele kowamanqamu weCAF Woman’s Champions League.
ISITHOMBE : FACEBOOK
MZWANDILE MHLONGO
IMAMELODI Sundowns Ladies idlulele kowamanqamu emqhudelwaneni iCaf Women’s Champions League, ngemuva kokunqoba iKawempe Muslim Ladies yase-Uganda ngamagoli amane kwelilodwa (4-1), emdlalweni owandulela owamanqami, eSuez Canal Stadium e-Egypt.
Umdlalo uqale ngesivinini esikhulu, njengoba iSundowns Ladies ikhombise ekuqaleni ukuthi ayizile ukuzodlala enkundleni. Amantombazane asePitori adlale ibhola elihlelekile nelisheshayo, nokwenze iKawempe yahluleka ukumelana nabo.
uRonnel Donnelly ukhombise ukuzimisela okukhulu njengoba evalele igoli lokuqala leSundowns ngasekuqaleni komdlalo, emuva kwebhola eliqhamuke ku-Asanda Hadebe. Ngomzuzu ka-34 uphinde washaya elesibili ngosizo lukaDaweti. Emizuzwini emithathu eshaye elesibili, uphinde wavalela elesithathu enethini.
Ngaphambi kokuphela kwesiwombe sokuqala, uNoxolo Cesane ushaye igoli lesine ngomzuzu ka-44, kwaba 4-0.
Esiwombeni sesibili, iKawempe izamile ukupaquza, nokuholele ekutheni ithole igoli lomthoba nhliziyo ngomzuzu ka-72, elishaywe uLatifah Nakasi, kwaba 4-1. Noma kunjalo, iSundowns ikwazile ukuvikela umphumela kwaze kwaba sekupheleni komdlalo.
Ukunqoba kweSundowns Ladies kusho ukuthi isingene kowamanqamu okokuqala kusukela ngonyaka ka-2023, lapho yagcina ukuphakamisa le ndebe. Iqembu seliyiwine le ndebe izikhathi ezimbili ngaphambili, ngo-2021 nango-2023.
Kowamanqamu ngoSonto, mhla ka-15 kuLwezi, izobhekana ne-AS FAR yaseMorocco, nokuyiyona evikela lesicoco, Yona ingene kowamanqamu ngemuva kokunqoba iLekié FF yaseCameroon ngo 1-0.
Lo mdlalo kulindeleke ukuba ube nzima, ngoba ngo-2022 i-AS FAR yashaya iSundowns ngo 4-0 kowamanqamu, kwathi ngo-2023 iSundowns yabuyisela izinduku kowandulela owamanqamu.
Umqeqeshi weSundowns Ladies, uGodfrey Sapula, uthe amantombazane akhe adlale kahle kakhulu, kodwa umsebenzi awukapheli ngoba inhloso enkulu ukubuya nendebe ekhaya.
